صبحية مع الرب
بسبّحك وبمجّدك يا ربّي يسوع، بهالصباح المبارك، مع الرسول يعقوب بن زبدى، صياد السمك اللي ترك كل شي وتبعك تا يصير، مع الرسل الباقيين، صياد بشر لملكوتك السماوي.
مع القديس يعقوب اللي كان من التلاميذ المقرّبين لالك، واللي سمّيتو، مع خيو يوحنا، ابني الرعد، منعلنك، يا ربّ، الاله الحي القايم بحياتنا واللي عم بتشيلنا من ظلمة الخطية اللي عم بتحاول تتغلغل فينا وبتصرفاتنا.
القدّيس يعقوب الرسول، ابن الانسان الصياد البسيط، وهالتلميذ اللي ترك الدني ومغرياتا، كان الشاهد الحقيقي عا قيامتك بحياتو من بعد ما لمس فيك انو التواجد بالملكوت السماوي بيحدّدو الانسان من خلال اعمالو وطريقة حياتو واستسلامو لمشيئتك.
مع القديس يعقوب الرسول، بدنا نشكرك يا ربّ عا محبتك العظيمة اللي بتحبّنا ياها، ونسبّحك لأنّك وعّيتنا على انّو المراكز قيمتا هيي بالخدمة والمحبة.
/الخوري يوسف بركات/
