صبحية مع الرب


28 Apr
28Apr
إعلان خاص

بسبّحك ويمجدك يا ربّي يسوع بهالصباح المبارك اللي فيه بتشرق علينا شمسك تا تدفينا من نار حبّك.

يا ربّ، كيف ما برمنا بحياتنا اليومية، وكيف ما فتّشنا منلاقي الحياة عم تتدفق من فيض حبّك الالهي رغم كل الظروف الصعبة اللي عم تواجهنا.

معك يا ربّ، تحول الخبز الفاني، خبز الحياة الرضية العابرة، لخبز بيعطي الغذا للحياة الأبدية.يا ربّ، هالكم رغيف والسمكتين اللي كانو مع الصبي منن الا دليل على فقر الطاقات البشرية بحياة الرسل والتلاميذ بوقتا، وانت جيت وفضت فيها الحياة الإلهية وطعميت وشبّعت الآلاف من الناس، وكل واحد عا قد ما بدّو.انتي اللي طلبت، يا ربّ، انو ينجمع اللي فضّل من الأكل لغذا الكنيسة عا مرّ التاريخ، منقدّملك كل شي منملكو ولو كان قليل، من مواهب ونعم ووزنات، نحنا اشتغلنا فيها وحاولنا اننا ننمّيها بحياتنا، تا تحوّلا لفيض حياة وحبّ إلهيّين بنعمتك الفياضة.


/الخوري يوسف بركات/

Social media khoddam El rab


تعليقات
* لن يتم نشر هذا البريد الإلكتروني على الموقع.