صبحية مع الرب

ببداية هالأسبوع المبارك بسبّحك يا ربّي يسوع مع كلّ إنسان إنت إخترتو تا يمجّدك بحياتو.

اللي بيلفتنا، يا ربّ، بطرس الرسول اللي، رغم ضعفو ورغم إعترافو بالخطية، بيرجع بينزل عند كلمتك وبيلقي شباك الصيد بالبحيرة.

ضعف بطرس وخطيتو ما كانو حاجز بينك وبينو، يا ربّ، إنت اللي جيت عا هالدني تا تردّ الخاطي، وهيدي قوتك وعظمتك وألوهيتك بإنّك إنتشلتو من ضعفو.

بطرس اللي ما كان بعدو مآمن فيك، غامر وأخد بكلامك، وزتّ حالو بحضنك يا ربّ، ووثق فيك وبكلمتك اللي وحدا كانت كافية تا يطلعلو صيد وفير من بعد تعب الليل بكامل من دون نتيجة.

ونحنا كمان يا ربّ متل بطرس الرسول، مهما كنّا تعبانين، أو كانت حالتنا الروحيّة والنفسيّة بالأرض، رح نحط حالنا بين إيديك من دون ما نتردّد أو نخاف لأنّنا مآمنين إنّو فيك منلاقي راحتنا وسلامنا.


/الخوري يوسف بركات/