صبحية مع الرب

بسبّحك يا ربّي يسوع ببداية هالاسبوع مع كل انسان عاش الشهادة لإلك.


يا يسوع، انت اللي عطيت تلاميذك، ومن خلالن كنيستك، تا يكونو باب الخلاص وشهود على حقيقة قيامتك بالعالم.


وبهالشهادة الحقيقية منقدر، نحنا ابناء الكنيسة، اننا نردّ كلّ الخواريف اللي ضاعو تا يرجعو لقطيعك.


ومن دون شهادتنا ككنيسة واحدة وجسد واحد فيك، ما حدا رح يقدر يعرف انّك حيّ بقلوبنا ويآمن بقيامتك من خلال اقوالنا وافعالنا.


وبكلامك لإلنا من خلال جماعة الرسل: "انتم شهود"، عم بتحطنا قدّام مسؤولية رسالتنا كتلاميذك نشهد لإلك بيوميات حياتنا.


ونحنا بدورنا رح ننقل هالكنز الغالي لكل انسان منلتقي فيه، من أقرب الناس لإلنا، بعيلتنا وببيئتنا وبمجتمعنا، لأبعد شخص عنّا. ما رح نخذلك يا ربّ، ورح نكون عا قد المسؤوليّة اللي ائتمنتنا عليّا.

/الخوري يوسف بركات/