صبحية مع الرب

حقيقة واحدة جيت عا هالعالم كرمالا يا ربّ وهيي انّك تهدم كلّ الاوثان اللي بقلوبنا نحنا البشر وترجّعلنا كرامتنا كأبناء وبنات لالك.

معك يا يسوع، ما عاد الهيكل مركز للعبادة ولا مكان لحضور الله بس، صرت انت بذاتك الهيكل الحقيقي وفيك منعبد الله لانك انت الحق والحياة، وفيك وإلك ومعك بتكون الصلاة الحقيقية.


فيك يا يسوع صار كل شي واحد، وفيك صار الخلاص، وفيك اكتملت الاسرار والنبوءات، وعنّك حكيو الانبيا، ولعندك قادو الشعوب.

انت هيكلنا يا يسوع، لعندك منجي تا نرفع صلاتنا لألله الآب السماوي بيّك. وروحك القدّوس، يا ربّ، هوّي اللي بيصلّي فينا بأنغام وأنّات ما بتنوصف. يا يسوعنا الحبيب، كنت وبتبقى حيّ فينا للأبد، وانت اللي عطيتنا اننا نحيا معك للأبد.


شو حلوة السعادة اللي ناطرتنا واللي عم نسعى اننا نحصل عليا لمن منوصل لعندك يا ربّ.



/الخوري يوسف بركات/