صبحية مع الرب

مع إشراقة نور هالصباح بسبّحك وبمجدك يا ربّي يسوع.

بإيمان بطرس رأس الكنيسة، منعلنك يا يسوع المسيح القايم من الموت ملكنا ومخلصنا.

بإيمان هالتلميذ الآخر اللي كان مع بطرس عند قبرك يا يسوع، منعلنك يا يسوع سيّد على حياتنا.

هالتلميذ الآخر هوي كل واحد وواحدة منا يا ربّ نحنا المدعوّين تا نشوفك بعين الايمان ونآمن.

هالتلميذ الآخر هوّي كل واحد وواحدة منّا يا ربّ، نحنا اللي ما لازم نكون بحاجة اننا نشوف تا نآمن لأننا بالعماد صرنا شهود لإلك، وتلاميذك اللي من المفروض انّك تفتخر فيون.

يا ربّي يسوع، بهالظرف اللي عم نمرق فيه بوطننا وبمختلف الاوطان، ماديا واقتصاديا وحياتيا ونفسيا، ساعدنا على اننا نثبت فيك ويزيد ايماننا بإنّك حاضر ومعنا ومنّك تاركنا وحامينا وناطر منّا اننا نكون، متل المجدلية، عم نركض تا نبشّر بحقيقة قيامتك فينا.


/الخوري يوسف بركات/