صبحية مع الرب
بشوفك يا يسوع عم تسأل بطرس الرسول ٣ مرات اذا بيحبك وكان جوابو نعم يا رب.
بس بوقتا ما كان عارف بطرس شو بتتطلّب المحبّة.
نحنا يا ربّ متل بطرس بأول رسالتو، منا عارفين، أو بالأحرى عارفين وما بدنا نصدّق انّو المحبة بتتطلب الرعاية وبتعني الاهتمام بالآخر وتأمين الغذا الروحي لإلو: من توصيل الكلمة لتثبيتا وحفظا والعمل بموجبا، للدخول بشركة معك والاتحاد فيك.
وظروف الحياة عم بتبعّدنا عن المفهوم الحقيقي لهالمحبة اللي بتتطلّب اتّباعك يا ربّ من خلال حمل الصليب، صليب الرسالة اللي حاملا كل حدا منّا، وصليب الألم والموت عن ذاتنا تا نعيش فيك.
يا ربّ، نحنا بدنا بس ما عم نعرف نستسلم لارادتك، ما عم نعرف نقلّك لتكن مشيئتك ومش مشيئتنا.
يا ربّ بدنا نحبّك ونطيعك ونعمل بحسب كلمتك اللي بتدعينا فيها للمحبّة الحقيقية. قوينا يا ربّ لأنو صحيح افكارنا حلوة بس جسدنا عم بيكون ضعيف.
/الخوري يوسف بركات/
