صبحية مع الرب

ببداية هالأسبوع المبارك بسبّحك وبمجّدك وبشكرك يا إله الرحمة.

يا ربّي يسوع، نحنا دايماً معك بحالة عبور، ومن دونك ما ممكن نقطع هالضفاف.

بدنا نعبر من أنانيّاتنا ومن حبّ الذات اللي بتغرينا بكتير من الأوقات، لضفّة الإيمان فيك ءنت الإله اللي بتشفينا من عاهاتنا ومن أمراضنا الداخليّة، من خطايانا الظاهرة والخفيّة.

بدنا نعبر معك لعند إخوتنا اللي هنّي متل مجنون الجراسيين، لعند اللي كبّلتن خطاياهن وسجنتن بسجن اليأس، وشوّهت تصرّفاتن، ونزعت عنن الكتير من صفاتن الإنسانيّة.

بدنا نعبر بسلام، ونحنا مستعدّين، من هالدني الفانية للملكوت تا نشارك بوليمتك السماويّة الأبديّة اللي محضّرلنا ياها شرط إنّو تكون قلوبنا مشتعلة فيك، وأعمالنا تعكس نورك وحبّك للعالم من خلالنا.


/الخوري يوسف بركات/