صبحية مع الرب

صباح المحبّة والإستعداد الدايم للقاءك هوي صباحي معك اليوم يا رب.

علمتنا يا رب بتعاليمك إنو ما حدا بيعرف ايمتى مجيء الملكوت، ولا حدا ممكن يحدّد علاماتو، ونحنا منقعد منتفلسف عليك وعا بعضنا البعض بعلامات نهاية العالم: هيدا اللي بيقول من ورا الزلازل، وهيدا بيقول من ورا الحروب، وهيدي بتقول من ورا الأوبئة وغيرا بتقول من ورا الوضع العالمي الصعب وغيرن الكتير.

ولا حدا منّا يا ربّ عم بيفكّر إنّو ملكوتك يا ربّ حاضر بكل لحظة فينا ومعنا وبيناتنا عا شرط إننا نستسلم لروحك القدّوس تا ينوّرنا عالحياة معك.

كل اللي علينا هوي إننا نمشي بحسب تعاليمك يا رب، ونكون مستعدّين بكل لحظة منعيشا بحياتنا للقاءك بالملكوت السماوي اللي محضّرلنا ياه، شرط إننا نكون عم نعكس صورتك بحياتنا.


/الخوري يوسف بركات/