صبحية مع الرب
بصبّحك يا ربّ ببداية هالنهار المبارك مع يوحنا وإيليا هالنبيين اللي مجّدوك بحياتن.
ايليا هالنبي العظيم اللي حطّك الأول بحياتو يا ربّ وأعلن إنّك الإله الواحد وغيرك ما في آلهة.
يوحنا آخر الأنبياء اللي أعلن إقتراب ملكوتك يا ربّ وتنبّأ بمجيئك اللي في رح بتخلّص العالم وتدينو.
ورغم كل الإمتيازات الروحيّة اللي كانو يتمتّعو فيها هالنبيين، ما قبلن الشعب ولا قبل كلامن عنّك، وهيك كمان رح بيعاملك ولا رح يقبلك كمخلّص لإلو من نير العبودية، لا بل رح يرفضك ويسلمك للموت.
وبعد اكتر من ٢٠٠٠ سنة بعدنا نحنا، المعتبرين حالنا مؤمنين، عم نتصرّف، بأوقات كتير، متل هالشعب اللي رفضك، عم نرفض كلمتك اللي بتطلب فيها منا إننا نسامح ونحب متلك، ما عم نقرا العلامات اللي عم بتحطلنا ياها، ولا عم نشوف بالقديسين (أنبياء عصرنا) ضمير العالم عم بيأنبونا عا خمولنا وأنانيتنا وبيدعونا إننا نرجع لدعوتنا إننا نبني ملكوتك فينا.
/الخوري يوسف بركات/
