صبحية مع الرب

صباحي اليوم مشرق بنورك يا ربي يسوع.

انت اللي خلقتنا يا رب وكونتنا عا صورتك ومثالك تا نمجّدك بكل عضو من اعضاءنا.

والعين هيي عضو مهم ومتخصص بالنور، وهيي، متل ما بتقلنا، سراج الجسد بتنشر النور بكل الجسد.

نحنا ابناء النهار وخلقتنا يا رب تا نمشي بالنور، ونورتنا بكلمتك اللي صارت انسان تا تنزع عنا الظلمة والجهل والضياع.

يا الهي الحبيب، انت اللي نورتنا بحلول روحك القدوس بقلوبنا تا نعرفك ونعبدك ونحبك، بس نحنا بكتير من الاوقات منفضل عتمة الليل معتبرين انها بتستر خطايانا.

واوقات منختار انو ما نشوف بعيوننا اللي خلقتلنا ياها، وخصوصي عيون قلوبنا، تا ما نخجل من عرينا قدامك، فا بيصير عنا عينين بس ما منقشع.

ذكّرنا يا رب انك دايما اقرب منا لإلنا وانك مرافقنا مهما كان الليل اللي فينا ظلام.


/الخوري يوسف بركات/