صبحية مع الرب


08 Feb
08Feb


ببداية هالأسبوع المبارك، اللي منتذكر فيه موتانا اللي سبقونا لعندك، بسبّحك يا ربّ تسبيح شكر على هالليل اللي مرق وعلى كل الإيام اللي عم تمرق علينا وإنت حاضر معنا.

منشوفك اليوم يا ربّ عم بتحذّر تلاميذك وكل الناس من خمير الفريسيين اللي هوي الكذب وتخباية القيم ورا وجوهن المزيّفة.

معك يا ربّي يسوع ما في شي مخفي، كل شي واضح وصريح معك لأنّك إله الحق والحقيقة، وتلميذك الحقيقي رسالتو هيك لازم تكون منزّهة عن الخوف من قول الحقيقة وبعيدة عن الأنانية.

منتأمّل اليوم بإحدى مخلوقاتك : العصافير، ومنسلّمك متلن حياتنا وأمورنا وهمومنا، وهيك منقدر نحسّ إنّك دايماً معنا وبيناتنا.

فإذا نحنا كنّا مسلّمينك ذاتنا وحياتنا وكلّ شي فيها، من شو أو من مين بدنا نخاف؟

إنت يا ربّ ما بتنسى خلايقك كلّا، أكيد ما رح تتخلى عنا نحنا ولادك الملتجئين إلك بهالأزمة الصعبة اللي عم نمرق فيها.


/الخوري يوسف بركات/

أضغط هنا... للإنتقال إلى صفحاتنا على سوشيال ميديا

تعليقات
* لن يتم نشر هذا البريد الإلكتروني على الموقع.