بصبحك يا ربّي يسوع، ببداية هالاسبوع، بصباح مليان كلو فرح وبهجة.
متل ما تلقّى موسى الوصايا العشر عالجبل ونزّلن للناس تا يعيشو متل ما طلبت منّو، هيك انتي يا رب، بمجيئك عالأرض عطيت اجمل تعليم بيحتاجو الانسان، وهوي التطويبات عالجبل.
بشوفك عم تعطي الفرح الكبير للمساكين بالروح ولأنقياء القلوب والودعاء اللي مسلمين حالن لروحك القدوس يشتغل فيون.
بشوفك عم تعطي الفرح الكبير للرحماء مع الآخرين واللي ما عندن همّ اللا انّن يرضوك.بشوفك عم تعطي الفرح الكبير للحزانى اللي مسلمينك حزنن اللي رح يتحول معك لعزا.
بشوفك عم تعطي الفرح الكبير للجوعانين والعطشانين لكلمتك ولجسدك ودمك زادن وزوادتن.
بشوفك عم تعطي الفرح الكبير للمضطهَدين اللي عم يسعو لنشر سلامك وحبك بين العالم.
بشوفك عم تعطينا الفرح الكبير اذا عرفنا تحملنا كل التجارب حبا فيا. ورح نحاول ما نخذلك يا رب.
/الخوري يوسف بركات/
أضغط هنا... للإنتقال إلى صفحاتنا على سوشيال ميديا
