صبحية مع الرب


27 Jan
27Jan


صباح الخدمة بمجانيّة هوي صباحي معك يا ربّي يسوع.

بشوف اليوم ام يعقوب ويوحنا عم تطلب منّك طلب غريب بس هيدا الطلب بيشبه اكترية طلباتنا اليوم وكل يوم يا ربّ، بدنا نكون نحنا كل شي.

بس الأجمل كان جوابك اللي بيعلّم من دون ما يجرح ويأذي، قدّمتلّا ذاتك مثال للخدمة ووصلت حتى بذل الذات تا تفتدي الكل، وهيدا الشي الصعب عالانسان، ولو حتى مؤمن وملتزم، انو يعيشو.


بشوفك يا رب بتعلّم تلاميذك عن عظمة الخدمة كمبدأ أساسي تا نتميّز بملكوتك، ومن خلال تلاميذك عم تعلّمنا انّو نكون عم نعرف نعيش حسب رغبة قلبك اللي هيّي اننا نحب ونخدم بمحبة ونوصّل كلمتك لكل انسان بأمانة.

شو مهم نفهم يا رب، نحنا اللي منآمن فيك، انو القعدة معك بالملكوت بتفرض علينا نكون مستعدّين انّو نحمل الصليب، صليب الخدمة والاوجاع وبذل الذات اللي فيه منكون عم نتجرٌد عن الأنا اللي عنّا تا نوصل لعندك بخدمة الآخرين.

/الخوري يوسف بركات/

أضغط هنا... للإنتقال إلى صفحاتنا على سوشيال ميديا

تعليقات
* لن يتم نشر هذا البريد الإلكتروني على الموقع.