مع القديس بطرس الرسول بصبّحك يا ربّ بهالنهار المبارك.
بهاليوم اللي فيه عم نتذكر ونكرّم سلاسل القديس بطرس اللي كفر بذاتو، متل ما طلبت منّو، وتخلى عنها كرمال يتبعك، منتوقّف لحظات ومنسأل حالنا اذا نحنا كمان عم نتمثل بالقديس بطرس ونتخلى عن ذاتنا تا نكون معك؟
بهاليوم اللي فيه عم نكرّم سلاسل القديس بطرس اللي فيها عمل بكلامك وحمل صليبو وتبعك يا ربّي يسوع، منتوقف لحظات ومنسأل حالنا اذا عم نحمل سلاسل الالم والصعوبات والضيق ونرفعا ذبيحة حبّ لإلك ومشاركة مع آلامك؟
بظل هالأزمة اللي عم نعيشا، ومع تفشي وباء الكورونا والوضع الاقتصادي المهتري، عم تدعينا يا ربّ تا نكون متل مار بطرس وكل القدّيسين، اللي ثبتو بإيمانن، نحط كل رجانا فيك، ونسلّمك حياتنا وكل شي فيها من مصاعب واحزان وافراح، وكلنا ثقة انّك ما بتريد الا خيرنا وخلاصنا.
/الخوري يوسف بركات/
