صبحية مع الرب


15 Jan
15Jan


مع العدرا مريم إم النور وسيدة الزروع بصبّحك بهالصباح المبارك يا ربّي يسوع.

بموسم هالشتي، اللي فيه بيهتم الناس بمزروعاتن وبيشتغلو عليا تا تنما وتعطي ثمارا بالربيع، كنيستنا بتلجأ للعدرا مريم، إمك، وبتطلب منها تزتّ مشلحا عليها تا تتبارك بنعمة روحك القدوس يا ربّ.

وبموسم هالشتي المبارك، ومتل ما إنت باركت الميّ يا ربّي يسوع، وقت تعمّدت بنهر الأردن عا يد يوحنا المعمدان، أراضينا ومزروعاتنا بتتبارك بالأمطار اللي بتهطل عليها.

بس كمان بموسم الشتي، في كتير عائلات بتتبهدل تحت الأمطار ، منها اللي ما عندا بيت ونايمة بالشوارع او بالخيم، ومنها اللي بيوتا عا حفت قبرا.

وكمان بموسم الشتي بتكتر الأمراض وخاصة بظل هالوباء اللي مجتاح بلدنا وبعدو عم بيزيد.

إيماننا فيك كتير كبير يا ربّ إنّك حاضر معنا وعم بتعزّينا بشدايدنا.
وتعبيراً عن إيماننا فيك، رح نسعى تا ما تفتر محبتنا لإلك ولبعضنا البعض، لا بل تزيد.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.