صبحية مع الرب


14 Jan
14Jan


شو بيحلى الصباح بعيون الإنسان اللي بيآمن فيك يا رب.

وشو حلو كلامك يا يسوع لمن بتحكي عن علاقة الحب المميّزة بينك وبين الله الآب.

ومن علاقة الحبّ الكاملة خلقت الإنسان حرّ تا يقدر يجاوبك عا دعوتك لإلو للقداسة بكل حرية ويعرف يميّز الصح من الخطأ، والخير من الشرّ وحتى كمان يعرف يميّز بين إنسان وإنسان.

وهيدا اللي عملو يوحنا اللي بحياتو ما ساوا حالو فيك، لا بل دايماً كان يحكي عنّك ويحضّرلك الطريق، وبالآخر دلّ العالم والتلاميذ عليك إنك إنت المسيح المنتظر.

وهالتمايز الكبير بينك وبين يوحنا، أو حتى بينك وبين القديسين لا بد ما يكون لأنّك متل ما بتقلنا اليوم إنو الإنسان الأرضي بيضل أرضي وبيحكي لغة الأرض ، وهودي كل البشر، بينما إنت يا رب وحدك السماوي وأقوالك وأفعالك هيي اللي بيّنت إنك بتحكي وبتفعل أفعال السما.

وهيك نحنا يا رب رح نحاول نتمثّل بيوحنا اللي دلّ عليك.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.