صباح القداسة هوي صباحي معك يا ربّي يسوع المسيح.
بهالصباح المبارك، ومع بداية سنة جديدة، بتحطلي يا ربّ برنامج حياة، متل ما عاشو يسوع مع يوسف ومريم.
وهالبرنامج هدفو إنّي عيش بحسب تعاليمك، يا ربّ، وبحسب الإسم اللي حاملو كمسيحي.
هالبرنامج اللي ما بيتّكل على هيدا أو هيداك من الأشخاص، لأنّو جوهر حياتنا هوي إنت يا ربّ اللي تجسّدت وصرت إنسان متلنا، عطينا ذاتك بِحُبّ تا نعيش ملء السعادة بحياتنا.
هالبرنامج اللي بتدعينا فيه يا ربّي يسوع إنّو ما نبعد عنّك تا ما نضيع، ومعك يا رب كل شي مضمون.
ومتل ما يوسف ومريم تمّمو كل اللي طلبِتو منّن الشريعة، كمان عليّي أنا الإنسان المؤمن فيك يا ربّ إنّي قدّملك ذاتي وتمّم علاقة الحب معك.
يا ربٍّي يسوع، أنا بعترف وبعلنك يسوعي "مخلّصي" ورح حاول تكون كل تفاصيل حياتي أفعال تعبّر عن شكري وإمتناني وحبّي العميق تجاهك يا ربّ.
/الخوري يوسف بركات/
