منسبّحك يا ربّ ومنعظّمك ومنباركك عا هالصباح المبارك اللي فيه بتشرق علينا بنورك.


الإنسان لمَّن بيعطش بيبرِّم عا أقرب مكان يشرب منُّو تا يرويلو عطشو وكتير من الأوقات بيكون قريب مِنّو بس ما بيشوفو.


ونحنا يا ربّ دايماً عنَّا عطش لكلامك اللي دايماً موجود تا يروينا وقد ما إرتوينا ما منشبع مِنّو.


عنَّا عطش لنلتقي فيك يا ربّ بالرغم من إنَّك إنتَ اللي عم تدعينا، نحنا اللي دايماً عم نفتِّش، بعيد عنَّك أوقات كتير، عن أساليب أو أماكن نلاقي الراحة فيها، بس وحدك الملجأ والراحة الدائمة.


عِنَّا عطش لنتِّحد فيك يا ربّ بالرغم من إنَّك عاطينا جسدك ودمك اللي سفكتن حبّا فينا، نحنا اللي قد ما برمنا ما رح نلاقي حدا أو شي يملِّينا إلّا حُبَّك اللي ما إلو حدود.


عنّا عطش إلك يا روح الله القدّوس، تعا واروينا من ينابيع المحبّة والرحمّة والسلام والإيمان.

/الخوري يوسف بركات/