لعازر مات يا ربّ وإنت أكَّدت لإخواتو مرتا ومريم إنّو نايم ومش ميِّت.

لأنّو معك صار الموت معبر للحياة الأبديِّة وبطَّل يكون نهاية.


ولأنَّك إنت يا ربّ نبع الحياة اللي بتتدفَّق علينا، كلّنا إيمان بإنّنا رح نقطع هالوادي المعتِّم بالخطيِّة للحياة الأبديِّة معك.


لهيك كِلنا إيمان ورجا إنَّك إنتَ الهدف، يا ربّ، وإننا رح نموت مع لعازر عن خطيِّتنا تا نقوم ونحصل عالحياة الدايمة معك لأنَّك إنتَ القيامة والحياة.


يا ربّ، لعازر اللي بموتو الجسدي ٤ إيَّام مثَّل البشريِّة الميتة كِلّا، بيدعينا اليوم تا نوثق فيك إنّنا معك ما منموت لا بل إنتَ اللي بتحيّينا.


تعا يا ربّ وشيلنا من موت هالعالم وساعدنا تا نعبر من هالحياة الفانية للحياة معك اللي ما بتشيخ وأبديِّة.

ونحنا كلنا إيمان فيك، يا ربّ، إنَّك رح تحوِّل موتنا لحياة.


تعا يا ربّ وأسكب فينا حياتك ونجِّينا من ذاتنا الأرضيِّة تا نربحك ونسبحك بالملكوت.

/الخوري يوسف بركات/