عجيب إنتَ بِحُبَّك يا ربّي يسوع، كيف بتسكب هالحبّ بسلاسة عا كلّ إنسان وخاصَّةً الضايعين منّا.


عجيب حُبَّك يا ربّ، كيف بترحم الإنسان الخاطي وبتعطيه فُرَص كتيري تا يتوب.


عجيب حُبَّك يا ربّ، كيف بتركض ورا الإنسان الضايع والبعيد عنَّك تا توعّيه وتنجّيه من الضياع.


عجيب حُبَّك يا ربّ، كيف تنازلت عن عرش مجدك السماوي وتجسَّدت وصرت متلنا إنسان تا تردّنا عن الخطأ والخطيِّة وتصحِّحلنا مسارنا صوبك.


عجيب حُبَّك يا ربّ، كيف جيت تحطّ سلامك عا هالأرض وترحم الخاطي وتحرِّرو وترجّعو للبيت السماوي بدل ما تدينو.


كلنا يا ربّ، بمحلّات منضلّ عن الطريق شوي.


البعض مننا بيعترف بضياعو عا ضوء حُبَّك وبيرجع بيتوب، والبعض بيضلّ بيبرِّر حالو وبيصير يضيع أكتر وأكتر.


اليوم بدنا نقلَّك كلّ واحد وواحدة منّا : إرحمني يا ربّ أنا الخاطي (ة) وخلّصني تا إشتِرِك بوليمة حُبَّك.

/الخوري يوسف بركات/