الله معك...


قال فيه رجّال ختيار بالضّيعَة إسمو سمعان لا مثقَّف ولا معلَّم بيقَضّي نهارو بالحقلِة بيِسقي الأرض، بس كان كِلّ مرَّة يِسمَع دقِّة جرس الكنيسة يترُك كِلّ شي ويروح عَ الكنيسة بوَحلاتو. 

كِلّ يَوم كان يعمِل نفس الشي. 

هَونيك يوم أثار تساؤل كاهن الضّيعَة اللي قرَّب مِنّو وسألو : 

«يا سمعان كِلّ يَوم بتِترُك شِغلَك وبتِجي لَهَون، شو بتقِلّو لرَبَّك؟». 

جاوبو سمعان :

«يا أبونا أنا ما بعرف كَتِّر حَكي وإتفَلسَف كتير، كِلّ يَوم بوقَف قدّام رَبّي وبقِلّو يا يسوع أنا سمعان، بقعُد شوَي بَعمِلّو زيارة وبفِلّ».

هونيك نهار كَسَر سمعان إجرو ونَقَلوه عَ المستشفى وطول الفترة اللي قَعَد فيها سمعان بالمستشفى البسمِة ما فارَقِت وِجّو.

تعَجَّبو فيه المُمَرِّضات وإجِت مُمَرِّضَة سألِتو :

«يا عمّ إنتَ مِش موجوع؟»

- «بلى»

- «شو السِرّ اللي بيخَلِّيك تضحَك إنتَ ومَوجوع؟» 

قال :

«في رجّال بيِجي كِلّ يَوم بيسَلّيني وبينَسّيني أوجاعي». 

«ولا مرَّة شِفِت عندك حدا بالغُرفِة» قالِت المُمَرِّضَة.

جاوَبها :

«إنتِ ما عَم بتشوفيه بس أنا عم شوفو.. بيِجي بيوقَف حَدّي وبيقِلّي : يا سمعان أنا يسوع».



الزوّادة بتدعيني وبتدعيك : 

لحتَّى نوقَف قدّام يسوع بإيمان وبساطَة وطيبِة قلب ونِترُك قلبنا يحكي مع قلبو.
أكيد رح بيقِلّو يا يسوع أنا فلان. والله معك.

 المصدر : صوت المحبّة