تعوَّدنا كِلّ سنة، بعد عيد الميلاد، إننا نعَيِّد بداية سنة جديدة، ونتمنّى إنّها تكون أفضل مِن السنة اللي مرقِت قَبلا. 

وكِلّ سنة منفتِكِر إنو السنة اللي قَطَعِت كانِت سيئة ومنتمنّى إنّو تِجينا سنة جديدة مُمَيَّزة.

بس مننسى إنّو رغم كلّ الصعوبات اللي واجهناها بهالسنة كانت إيد الربّ معنا دايماً.

مننسى إنّو رغم كلّ الآلام والأمراض اللي مرقنا فيا بهالسنة كان الربّ وَحدو هوّي الشافي، إِذا مش جسديًّا، أكيد  روحيًّا ونفسيًّا.

مننسى إنّو رغم كِلّ الأحزان اللي عشناها بهالسنة كان الربّ هوّي المُعزّي.

مننسى إنّو رغم كلّ التقلُّبات والعواصف اللي عَصَفِت فينا بهالسنة، كان الربّ هوّي اللي حامينا.

اليوم وبكرا وكِلّ يوم، مع بداية سنة جديدة من حياتنا، خلّونا بهالـ ٣٦٥ يوم نشكُر فيون الربّ عا حضورو معنا بكِلّ لحظة مِرقِت بحياتنا، ونتمنّى بهالسنة الجديدة إننا نكون واعيين أكتر عا رِعايتو لإلنا. 

ومهما كانِت السنة اللي مِرقِت تعيسة أرضيًّا، بس بتبقى حلوة مع الربّ.

وإذا بدنا نُطلُب.. 

يا ريت منُطلُب مِنّو إنّو يمَلّينا مِن حُبّو، مِن حنانو، من رَحمتو، مِن فَرَحو ومِن سلامو.

/الخوري يوسف بركات/