الله معك...
راهِب بصَحرا الصَّعيد تعَرَّض لتجارِب كتيرِة، تَرَك دَيرو وما سِمِع نَصيحِة مُرشِدو الرّوحي قَصَد إحدى مُدُن مصر، تعَرَّف عَ بنت كاهِن وَثَني وطَلَبها من بَيّها.
جاوَبو إنّو ما بيِقدَر يزَوّجو ايّاها بَلا ما يسأل كبير خَدَمِة المَذبَح.
هالأخير طَلَب مِنّو يتنَكَّر لَمَسيحو.
فَتَح الشَبّ تِمّو لَيُنكُر المَسيح، وشاف كبير الكَهَنِة شِبِه ألسِنِة كأنّها حمامِة عَم تِخرُج مِن تِمّو بَدَل كلام النِكران.
قدّام هالمَشهَد طَلَب من الصَبِيِّة ومِن بَيّها التَرَوّي لأنّو شاف إله الشَبّ مُحيط فيه وما عَم يِتركوا أبدًا.
لَمّا عِرِف الشَبّ شو شاف كبير الكَهَنِة استَفاق من ضَياعو وقال :
«أنا تَرَكت المَسيح بس هوّي ما تَرَكني، وبَعدو واقِف بالقُرب مِنّي رغم غَلَطي وكِلّ شروري».
الزوّادة بتذكِّرني وبتذَكّرك :
بِيقول صاحِب المزامير :
أين أهرُب مِن نورِ وَجهِكَ إن صعِدتُ إلى السَّماء أنتَ هُناكَ وإن إنحَدَرتُ إلى الجَحيم فأنتَ حاضِرٌ. والله معك.
المصدر : صوت المحبّة
