الله معك...
أحد الكهَنِة بأمر الطاعَة إنتَقَل مِن بَلَدو لبَلَد رِسالِة بعيد وصَعب.
ومِن بعد سِنِة رِجِع إنتَقَل لبَلَد رِسالِة أبعَد وأصعَب، لمّا سألناه :
«كيف مَطرَح ما إنت؟ ووين أحسَن؟».
كان جوابو :
«مَطرَح ما أنا اليوم أحسَن مِن مَطرَح مبارِح، ومَطرَح ما رَح يوَدّيني بَعدين، رَح يكون دايماً الأحسن».
هالجواب طَرَحلنا تساؤل :
قَدَّيش عَم نَعرِف نعيش اللحظة الحاضرَة والنِّعمِة الحاضرَة دايماً لأحسن :
- نحنا منِتحَسَّر عَ الماضي ومِنقول : رزق ألله.
- أو منِتأفَّف مِن الحاضِر ومِنقول : ما بيروح يَوم وبيِجي مِتلو.
- أو منِتخَوَّف مِن بُكرا ومِنقول: يِدرى مين يعيش.
الزوّادة بتقلّي وبتقلَّك :
تطَلَّع وشوف نِعمِة هالنهار، وخَلّيه يكون الأحسَن بَين كِلّ الإيّام.
ومِن يَوم لَيَوم، بتِبقى نِعمِة الأفضَل مرافقِتَك وبتِخلُق فيك فَرَحَين : فَرَح الطاعة، وفَرَح القناعَة إنَّك مَوجود مَطرَح ما ألله بَدّو ايّاك تكون. والله معك.
المصدر : صوت المحبّة
