الله معك...
كاهِن بينظِّم إحتفالات رعيتو بطريقة مُتَّقَنِة ومنَظّمِة ما بيكون فِيا ولا نَقص ولا خَلَل.
وهَيك بيِجذُب آلاف الناس للمُشاركِة.
بيَوم مِن الإيّام عَزَم المُطران لَيشارِكُن بِتُطواف القربان ولَيشوف طَريقتو.
وهَيك المُطران بيعَمِّم الطَريقَة عَ بَقِيِّة الكَهَنِة والرعايا.
بعد التطواف يَللي تكَلَّل بالزهور والأنوار، الناس كانو كِلُّن فرحانين.
توَجَّه الكاهِن لعَند المُطران وسألو :
«شو.. كيف كان؟ سَيِّدنا شو رأيك»؟
جاوَبو وقال :
«شي كتير حِلو شو هالطَريقَة الرائعَة يَللي نَظَّمِت فِيا التطواف، أنا بهَنّيك ولَكِن نسيت إنَّك تحَطّ القربان بقَلب الشُّعاع، نسيت يسوع».
الزوّادة بتقلّي وبتقلَّك :
عالَم اليَوم بيِخلَقِلنا حاجات جديدِة بتضَيِّعنا وبِتنَسّينا الحاجات الأساسِيِّة، خَلّينا اليوم نتذَكَّر قَول الإنجيل :
«تَهتَمّين بأمور كثيرة والمَطلوب واحد»
ونِسأل وَين صار المَسيح بِحَياتنا؟ والله معك.
المصدر : صوت المحبّة
