الله معك...
كريستوفور شَبّ قَوي البنيِه وعَندو كِلّ النَّشاط والقُدرة لأعظم كائِن عَ الأرض.
فدَلّوه عَ أحَد الملوك.
وقت يَللي كان عم يِخدمو سمع مُطرِب عَم بيغَنّي وبيقول :
«الشيطان أعظم كائِن».
سأل :
«إذًا الشيطان أعظم من المَلِك».
الجواب كان نعم.
ترك الملِك ومشي مع الشيطان وعَ الطريق صادَف صَليب فهَرَب الشيطان بسرعة.
وشاف كريستوفور راهِب جاثي قدّام الصليب فبيسألو :
«مين عَم تِعبَد وكيف بقدَر إتعَرَّف عليه وإخدمو؟».
«هوّي أعظم الملوك، هوّي خالِق كِلّ المَخلوقات والكائنات!!!».
سأل كريستوفر :
«وكيف بِقدَر إخدمو؟».
جاوَب الرّاهِب :
«بتِخدمو بالصلا : صَلّي».
فجاوَب :
«ما بعرف»
- «صوم»
- «كيف بصوم وجِثّتي الضخمِة بتُطلُب غِذا كتير!».
فقَلّو :
«روح عَ النَّهر وانقول النّاس من ضفِّة للتانية».
فراقِتلو هالخدمِة وعِمِل فيها إيّام وسنين طويلِة.
وبيوم بيِجي طُفُل زغير أشقر بيُطلُب مِنّو يِنقلو للضُفِّة التانية.
وهوّي عَم يِحملو عَ كِتفو بيُشعُر بِتِقل كبير رَح يغَرّقو، فَبيشِدّ عَزيمتو وبيِنقُل الطُفُل للضُفِّة التانية وبيقِلّو إنّو تقيل.
فبيجاوبو الطُّفُل :
«صحيح، أحسَنت أنا تقيل تِقل العالَم يَللي خَلَقتو».
وبيِختِفي.
فبيِعلَم كريستوفورس إنّو الربّ يسوع إجا ليشَجّعو ويكافئو عَ تَضحِياتو في سبيل البَشَريِّة.
الزوّادة بتقلّي وبتقلَّك :
الخِدمِة عَمَل جَبّار بيِتطَلَّب مِن كِلّ واحَد مِنّا إنّو يقوم بِعَمَلو بِكِلّ أمانِة ومَحَبِّة. والله معك.
المصدر : صوت المحبّة
