الله معك...
بتَعرفو كيف بيِتصَيَّدو السعادين بإفريقيا؟
أكيد عَم تِضحَكو أنا رح قِلكُن كيف!
الأفارقَة بحاجِة للسعدان لِأنّن يدَربوه تَ يصير بهلواني يعمِل بالسيرك، من غير المُمكِن إصطيادو بالسلاح، لذلك إبتَكَر الأفارقَة طريقَة : بعد دراسِة إكتَشَفوا إنّو السعدان بيحِبّ البذورات يعني الجوز واللّوز والمُكَسَّرات، أكتَر مِن هَيك اكتَشَفوا الصيّادين نوع مِن المراطبين الزجاجيِّة إلو عنق طويل وداخلو واسِع، بس هالعنق الطَّويل بيِحمُل مِشكلِة، بشَكل إنّو يِسمَح بَس لَإيد السعدان هيّي وفاضيِة إنّو تفوت لَجُوّا وتِضهر، وبيحَطّو داخِل المرطبان المُكَسَّرات، وكِلّ اللي بيحِبّو السعدان، وبيخَبّو المراطبين بالرَّمل وبيِتخَبّو.
وبيُركضوا السعادين عَ الريحَة وبس ينَزِّلو إيدُن بكَعب المرطبان بيعَبّو إيدُن عَ قَدّ ما بتِقدَر تساع.
المِشكلِة الكبيرِة لَمّا بَدُّن يِسحَبو إيدُن حتَّى ياكلو، بتِعلَق وبيصيرو يشِدّو بِكِلّ قُوِّتُن حتَّى يِخلَصو وهَون بيوقَع الصِّراع :
إيد فارغَة بتُضهَر، متلانة ما بتُضهَر، وبَين صِراع إيد فارغَة أو متلانِة ينمَسَك بالشَّبَك.
الزوّادة بتسألنا اليوم :
قدَّيش في إشيا كامشِتنا ومفَكرينا هِيّي الأساس ومضَيعِتلنا حُرِّيِّتنا ومخَلِّتنا نكون مُستَعبَدين.
عِنّا الشجاعَة نِفلُت اللي بإيدنا حتَّى نُحصَل عَ الأهَمّ؟ والله معك.
المصدر : صوت المحبّة
