الله معك...
صيّاد بإحدى رحلات الصَّيد بيِمسُك عصفور عَ الشَّبَك.
هالعصفور جميل المنظر، أكتر من هيك بيِحكي بيقول للصيّاد :
«إذا اعطيتك تلات نصايح بتتركني»؟
جاوَب الصيّاد :
«إذا كانو مقنعين ومُفيدين أكيد بتركَك».
«الأولي ما تصدِّق كلّ يَللي بيِنقال إلَك، التانيِة ما تضَيِّع كنز بيكون بَين إيدَك، التالتِة ما تركُض وَرا هَدَف ما بتِقدَر تحصَل علَيه».
عَجَبوه النصايِح وتَرَك العصفور.
لمّا صار العصفور عَ راس الشجرة بيقِلّو للصيّاد :
«يا مجنون بَدّي قِلَّك سِرّ :
بداخلي في جوهرَة تمينِة لَو دَبَحتني وأخَدتها كِنت أغنى النّاس».
الصيّاد بيتحَمَّس بيِطلَع عَ الشجرة وبيحاوِل يطارِد العصفور من شِلح لشِلح.
وَقَع عَ الأرض ، بيقَرِّب العصفور وبيقِلّو :
«يا مَجنون بِكِلّ أسَف بقِلَّك ضَيَّعت النصايِح التلاتة وضَيَّعتني، صَدَّقت شو قِلتِلَّك، رَكَضِت وَرا يَللي ما فيك تحصَل عليه، وضَيَّعت كنز كان بإيدَك وتَرَكتو»...
الزوّادة بتقلّي وبتقلَّك :
«ما تصَدِّق كِلّ يَللي بيِنقال إلَك، ما تضَيِّع كنز بيكون بَين إيدَيك، وما تِركُض وَرا هَدَف ما بتِقدَر تحصَل علَيه». والله معك.
المصدر : صوت المحبّة
