الله معكن....
بحِبّ خَبِّركُن عن هالرجّال.
إسمو مارتِن غري، عاش مع أهلو ببولندا، مع الأسف كِلّ أهلو ماتو بأفران الغاز النازيِّة إنَّما هوّي هَرَب وراح عَ فرنسا وكَتَب كتاب سمّاه :
«بإسم أهلي وأخصّائي»
شَرَح فيه عن أهلو وعن تعذيبُن وخلاصو.
وبَنى بعدها حياة زوجيِّة عائليِّة اشتَغَل بتجارِة الخَشَب، عَمَّر قَصر من أجمل القُصور بإحدى الغابات ولكن بأحد الإيّام هَبّ حريق بالغابِة فمات كِلّ أفراد عَيلتو.
فَشو كانِت رَدِّة فِعلو؟
انتَحَر؟
لأ ما انتَحَر إنَّما أسَّس مؤسَّسِة ضُدّ حرايق الغابات وكَتَب كتاب سَمّاه :
«كتاب الحياة».
بيقول فيه :
«صحيحٌ أنَّني لا أؤمن بالله، ولكنّي أؤمن بأنَّ الخير أقوى من الشرّ وأنَّ الحياة أقوى من الموت، وبأنَّ الحُبَّ أقوى من الألم والخطيئة».
ومِن خِلال كتابو الأخير كتار حَسّو بقيمِة حياتُن، وعِرفو إنّو الحياة إلها فايدِتها مهما الإنسان تألَّم، وإنّو الألم نار بتطَهِّر بس ما بتِحرُق !!!
الزوّادة اليوم بتُطلُب مِنّي ومِنَّك ومن كِلّ إنسان متألِّم إنّو يحَوِّل المَوت مِن ألَم مَخاض لألم وِلادِة جديدِة. والله معك.
المصدر : صوت المحبّة
