الله معك...
بيَوم مِن الإيّام، ألوان العالم كِلّو التَقِت وبَلَّشِت تتقاتَل.
كِلّ لَون يِدِّعي إنّو هوّي الأحلى والأهَمّ والأنفع، ويتفاخَرو عَ صوت عالي إنّو كِلّ واحَد هوّي الأفضل.
وعِليِت الصَرخَة وما ضَلّ حدا ما سِمِع صَوتُن عَم يِتخانَقو.
ولكن فجأة، بيِلمَع بَرق وبيُقصُف رعد، وبيِنهِمِر المَطَر بِغَزارَة.
إرتَعَبِت الألوان والتَمِّت ع بعضها، كِلّ لَون عَم يجَرِّب يِحمي التاني.
إلتَفَت الشِتي صَوبُن وقَلُّن :
«ما أغباكُن! عم تِتخانَقو مع بعضكُن! وكِلّ واحَد عَم يجَرِّب يسَيطِر عَ التاني!
مِش عارفين إنّو ألله هُوّي اللي خَلَقكُن كِلكُن، لرِسالِة معَيَّنِة وفَريدِة ومُمَيَّزِة، ولَو مِختِلفِة ؟؟
امسِكو إيدَين بَعضكُن وتَعو صوبي! وألله، رَح يِزرَعكُن بالسما قَوس قُزَح رائِع تَ يبَرهِن إنّو بيحِبكُن كِلكُن وإنّو قادرين تعيشو سَوا بِسلام.
ورَح يكون هالقَوس علامِة رَجا لَكِلّ الإيّام اللي جايي وعَهد ما بيِفنى إنّو هوّي مَعكُن للأبد».
الزوّادة بتقِلّي وبتقلَّك :
كِلما شِفِت قَوس قُزَح تِتذَكَّر هالخَبرِيِّة وتفَكِّر إنّو إذا كِنّا مِختِلفين، نِحنا مُتَكاملين، وكِلّ ما التَقَيت بِشَخص اليوم تقَبَّل إختِلافو وما تحَوّلو لَخِلاف وتُشكُر ألله َع غِنَى التَنَوُّع، وتحَوّلو لَتَكامُل ووِحدِة؟ والله معك.
المصدر : صوت المحبّة
