الله معك...


عندَك مشكله؟ ومين مِنّا ما عِندو مشاكِل؟

إنتَ اللي عندَك مشكلِة كبيرِة، وما عِدِت عارِف كيف بَدَّك تحِلَّا، عالِم حكيم رَح يَعطيك هالنصيحة.


وبيقول :

- كِنت لاحِظ دايماً إنّو اللي كان يكَبِّلني قدّام مسألِة علمِيِّة صُعبِة، هوّي تعقيدها بالذات.

فكِنت بادِر لتَقسيم هالمسألِة لعناصِر بسيطَة، وحَلُّن واحَد وَرا التاني، وفجأة كان ضغط الصعوبِة يخِفّ.

تماماً مِتل وقت بيكون بدَّك تُقرا مقالة أو جريدة أو كتاب فَرد دفعة.

بتحِسّ إنَّك ما فهِمت شي.

بس لمّا تِرجَع بِتَرَوّي تقراه كلمة ورا كلمة، ومقطَع وَرا مقطَع، بيوضَح المَعنى وبيِسهَل النص.


هالعالِم بيِدعيك اليوم تبَلِّش تفَصِّل مِشكِلتَك مهما كان نوعها، وبَدَل ما تشِدّ عَ الخيط وينعَقَد أكتَر، جَرِّب تفِكّ عقدِة ورا عقدِة وبِتشوف كيف الحبل بيحِلّ. 



الزوّادة بتقِلَّك اليوم :

كون مِتِل المسافِر اللي قبل ما يِمشي بيِدرس سَفرتو عَ الخارطَة وبيقَسِّمها مراحِل.

ومن محَطَّة لمحَطَّة، بتُقصَر السَفرَة وبتِسهَل الطريق وبتوصَل بالسلامِة. والله معك.

المصدر : صوت المحبّة