الله معك...
بيوصَل شخص عند سقراط وبيقِلّو :
- إسمَع جايي خَبرَك شو عِمِل صاحبَك ! بيقاطعو سقراط الحَكيم وبيقِلّو :
- قبل ما تِحكي! اللي بَدَّك تقِللي ايّاه، مرَّقتو ع الغربال؟
- أيّ غِربال؟
- غربال الحَقيقَة ! تأكَّدِت إنّو اللي بَدَّك تخَبِّرني ايّاه حقيقي وما فيه كِذب؟
بيجاوبو :
- لأ ! أنا سمِعتو عن لسان حَدا !
- فإذَن لازِم تكون مرَّقتو بغِربال الطيبِة ! لأنو إذا مَنَّك أكيد من صُحّتو، لازِم يكون فيه شي حِلو حتَّى تخَبّرو؟
جاوَب الصَديق :
- بالعكس! ما فيه شي حلو أبداً !
- لكن ضروري يكون فيه شي مُفيد حتَّى بَدَّك تخَبِّرني إيّاه !!
- مُفيد؟ مِش بالضَبط !
ساعِتها إبتَسَم سقراط وقَلّو :
- إذا ما فيه شي حَقيقي ولا حِلو ولا مُفيد، بفَضِّل ما إسمَعو.. أمّا بالنِّسبِة إلَك، فَبفَضِّل تِنساه.
الزوّادة بتقِلّي وبتقِلَّك :
إنتَ المسؤول، إنتَ المعَلِّم، إنتَ الصَّديق، إنتَ الجار، إنتَ اللي عم تِسمَعنا :
كِلّما حاوَلت اليوم تخَبِّر خَبرِيِّة، جَرِّب مَرِّقها بغِربال الصُدق وغِربال الرَحمِة وغِربال الإفادة، قبل ما تقولا.
وبآخِر النهار، قَولَك شو بيكون بِقي فَوق الغِربال؟
الجواب عِندَك. والله معك.
المصدر : صوت المحبّة
