الله معك...
بيخَبرو عن أمير كان في عندو مشكِل مع الربّ وبيقول دايمًا :
«ألله مِش عادِل مَنّو قبضاي إلّا عَ الناس المناح وعَ يَللي بيخافوه وبيعيشو حسب وصاياه».
حاوَلو كتار يقنَعوه إنَّما مع الأسف كان متشَدِّد، باقي عَ قرارو.
بيَوم مِن الإيّام كان بالصَّيد، بيوصَل لـ سهل وحَدّو في نبع مَيّ، وُصِل للنَبِع شاف حَدّو شجرِة بَلّوط كبيرِة كتير متلانة ثِمار متلانة بلّوط، وبالسَّهل في بَطّيخ.
بيقول :
«عن جَدّ الربّ مش عادِل شجرِة جبّارة فيها ثمر كتير زغير ونبتِة كتير رفيعَة وزغيرِة فيها ثمار كتير كبيرِة».
ما خَلَّص كلامو حتَّى وِقعِت بَلّوطة عَ راسو وجَرحِتو.
قال :
«بُشكرَك يا ربّ لو كانِت البطّيخة مَحَلّها شو كان صار فيّي».
الزوّادة بتقلّي وبتقلَّك :
«الربّ عادِل بيَعرِف إنتَ لَشو محتاج، ما تِتكَبَّر علَيه إنَّما لازِم تِتقَبَّل كِلّ شي بيِجي مِنّو بيصير تذَكَّر إنّو «مَنْ يَصبُر إلى النِهايَة يَخْلُص»... والله معك.
المصدر : صوت المحبّة
