الله معك...
بيخَبّرو عن مدينة، وحَدّ المدينة كان في سِيرك وكِلّ شي محَضَّر للإحتفال، فجأة هَبِّت حَريقَة بالسِيرك، فطَلَب المُدير مِن المُهرِّج إنّو يروح عَ المدينِة ويُطلُب مُساعدِة الناس.
بس مع الأسف النّاس لمّا شافوه صارو يضحَكو ويقولو :
«رَهيب شو هالمُمَثِّل، بَدّو إنّو نروح مَعو ع السيرك».
صَرَخ فِيُن :
«أنا مِش عَم مَثِّل، السِيرك عَم يِحتِرِق».
كِلما ارتَفَع صَوتو، كِلما كانِت صيحات الضُحُك عَم تِرتِفِع.
المُهَرِّج ضَلّ يحاوِل يوَصِّل فُكرتو، والناس ضَلّو مُصرّين عَ الضُّحُك وعَ عدم تَصديقو لحتَّى السيرك احتَرَق بأكمَلو !!!
الزوّادة بتقلّي وبتقلَّك :
المُهرِّج هوّي صَوت الضَمير، صوت الربّ يَللي بيِدعينا لَعَيش حياتنا المسيحيِّة، بس مع الأسَف صَيحات وضَجيج العالَم عَم يِمنَعونا من سماع هالصَّوت يا رَيت منِسمَع قبل ما تكون حياتنا ضاعِت واحتَرَقِت. والله معك.
المصدر : صوت المحبّة
