الله معك...
القدّيس فـرنسوا كزافييه كان بيوم عم يتأمَّل، وخَطَر ببالو سؤال :
«شو القداسة ؟ كيف بدّي صير قدّيس؟».
وكأنّو فِهِم مِن الله عَم بيقِلّو وهوّي عَ راس جبل عالي :
«جَرِّب اطلَع لعَندي وبتَعرِف ساعِتها شو القداسة».
وفرنسوا قبضاي بالتسلُّق، عنيد، وبلَّش يطلع.
بعد ساعة، وِقِع.
وبما إنّو كمان شجاع، رِجِع وِقِف وكمَّل، ورِجِع وِقِع، ورِجِع وِقِف وكَمَّل.
بعدو كتير بعيد عن راس الجبل.
وقال لألله :
«خَلَص فهِمِت، القداسة مش إلي».
وضُحِك الله، مِن كِلّ قَلبو، وبتَعرفو قَدَّيش قلب الله كبير !
وقال لفرنسوا :
«يا صديقي، الظاهِر ما فهِمِت عليّي، القداسة مِش إنَّك توصَل لراس الجَبَل.
القداسة إنَّك لمّا توقَع تِرجَع توقَف وتكَمِّل طريقَك لعِندي».
الزوّادة بتقلّي وبتقلَّك :
مش عَيب توقَع، لازِم إذا وقِعت تِتشَجَّع وتكَمِّل المَسير، تذَكَّر الربّ عَ طريق الجِلجلِة وِقِع ثلات مرّات بس كَمَّل المشوار ووُصِل لمَجد القيامِة. والله معك.
المصدر : صوت المحبّة
