الله مَعَك...

سَأَل مَرّة رِجّال حَكيم تْلاميذُو : 

كيف بيقدرو يَعرِفو إنّو خَلِص اللّيل وإنّو الفَجر طَلّ؟

وصارو يِجاوْبوه :

– لَمّا منلَمَح النّور؟

قَلّن : – لأ.

– لَمّا منمَيّز اللّون الأسوَد مِن اللّون الأبيَض؟

قَلّن : – كمان لأ.

– لَكِن إيمتى يا مُعَلِّم بيطَلّ الفَجر؟

وجاوَبُن الحَكيم :

– لَمّا بتتطَلَّعو لبعيد بَعيد، وبتلمَحو إنسان جايي صَوبكُن، وبدون ما تَعرِفو مين هُوّي، بتقولو : “هَيدا خَيّي” ، ساعتا، وبَسّ ساعتا، بيكون الفَجر طَلّ.




الزَّوّادِة عم تِسألك :

قادر اليوم، تقوم بِهالتَّحدّيروتِختار مِن حواليك شَخص واحِد، عادةً ما بْتِرتاحلُو، وتقول :

اليوم… بَدّي شوف فيه وَجّ خَيّي؟

وِتعاملو وتِحبّو ع هالأساس؟

ويمكن، بِهالطَّريقة، مِن خَيّ لَخَيّ، بيوصَل يَوم ومنصير فيه كِلّنا سوا عَيلِة واحْدِة… وساعِتا بيكون الفَجر طَلّ ! والله معك.

المصدر : صوت المحبّة