الله معك...
اتنَين أصحاب كانوا مسافرين سوا وعلَيُن يِعبرو بقَلب غابِة كتير معتمِة وخطرَة.
وُصلو لنُصّ الطَّريق وبيطُلّ علَيهُن دِبّ ضَخم وقَرَّب صَوبُن وكان ناوي علَيهُن.
واحَد مِنهُن خاف كتير عَربَش عَ شجرة وتخَبّا والتّاني ما صارلو وَقت يُهرُب لأنّو يِبِس بأرضو من الخَوف.
زتّ حالو عَ الأرض وعِمِل حالو مَيِّت هَيك كانو مخَبرينو، إذا الدِبّ بيشوف جِتِّة ما بيدِقّ فيها.
قَطَع نَفَس، ولَمّا قَرَّب الدِبّ علَيه صار يشِمّو وهوّي رَح يبِجّ لكِن ما تحَرَّك.
تَرَكو الدِبّ وكَمَّل طَريقو.
لَمّا بَعَّد، إجا الرفيق حتَّى يِطَّمَّن عَ رفيقو.
قَلّو :
«شِفِت الدِبّ قَرَّب كتير عَ دَينتَك شو كان عَم بيقِلَّك؟»
قَلّو :
«قَلّي الدِبّ إذا عندك شي مشوار بحياتَك تِبقى إعرَف نَقّي رفقاتَك مِن الأشخاص اللي ما بيِتِركوك بلحظِة الخَطَر تواجِه المِحنِة وَحدَك».
الزوّادة بتقلّي وبتقلَّك :
بأوقات الصعوبِة تعَلَّم كيف ومين وشو لازِم تِختار، دباب هالدِني كتار صاليين علَينا بَدُّن يوَقعونا والأصدِقاء الحقيقيّين قلال وفي واحَد مِنهُن ولا مُمكِن يِترِكنا ويِتخلّا عَنّا ولا بأيّ لحظة مِن اللّحظات إنّو يتركنا. والله معك.
المصدر : صوت المحبّة
