الله معك...
جان ماري كان طالِب الكهنوت، والمُطران كان رافِض يرسمو كاهِن لأنّو ما كان أبدًا شاطِر باللّاهوت، قَلّو :
«يا خَيّي أعذُرني ما بقدَر إرسمَك كاهِن وإنتَ حمار باللّاهوت».
بيجاوبو جان ماري :
«يا سيِّدنا، شمشون بالعصور الماضيِة كان مَعو سرج حمار وإنتَ بتَعرِف شو قِدِر عِمِل بواسطِتو.
هَلَّق في بَين إيدَيك حمار كامِل جَرّبو وشوف شو بيِقدر الربّ يعمِل بواسطِتو».
إقتَنَع المُطران ورَسَم جان ماري كاهِن ولَكِن عَيَّنو بضَيعَة بعيدِة إسمها آرس.
وقِدِر الكاهِن اللي سَمّى حالو حمار، قِدِر يِحمُل يسوع لَكِلّ أهالي آرس ويقَدِّسُن، بالوَقت اللي كانو فيه الفرنسيّين بذروِة ثورِتُن عَ الكنيسِة والإكليروس.
مِن وَقتا صار مَعروف جان ماري بخوري آرس، وصار قدّيس.
الزوّادة بتقلّي وبتقلَّك :
إذا حَبَّيت تِنقُل يسوع لغَيرَك ما تقول أنا ما بِفهَم باللّاهوت قول يا ربّ أنا بَين إيدَيك إستَعمِلني تَ إحملَك للعالَم. والله معك.
المصدر : صوت المحبّة
