الله معك...
بيخَبّرو عن بَيّ كان عم يقرا جريدتو وكان إبنو عم يلعب حَدّو وبين إيدَيْه خريطه العالم، يعني كلّ الكُرَة الأرضيِّة، وكِلّ شوَيّ بيِجي لعند البَيّ وبيسألو :
«بابا خَبِّرني عن هالبَلَد، دَخلَك هالبَلَد شو عاصِمتو؟».
عَصَّب البَيّ، أخَد الخريطَة خَزَّقها وعَطاها لإبنو شي عشرين شَقفِة، بعد ٥ دقايِق رِجِع الإبن لعَند بَيّو والخريطَة صَحيحَة.
سأل البَيّ :
«كيف رَكَّبتها بهالسِّرعة؟ وكيف رَجَّعتها مِتِل ما كانِت؟».
جاوَب الصّبي :
«يا بابا عَ قفا الخريطَة في صورِة إنسان، رَكَّبتها، وظَبَطِت صورِة الكُرَة الأرضيِّة».
الزوّادة اليوم عَم بتذكِّرنا :
إنّو نحنا صورِة الله.
إذا رجِعنا تذَكَّرنا هالحقيقَة وتشَبَّهنا بهالصورَة كِلّ أفكارنا بتتغَيَّر للأفضَل وبتِنعَكَس أعمال صالحَة وبنّاءه.
وهَيك إذا بَنَينا الإنسان ما في خَوف عَ الكُرَة الأرضِيِّة. والله معك.
المصدر : صوت المحبّة
