الله معك...
«لا تطفئوا الروح الذي فيكم».
هيدي الـتـوصيِة وَجَّها الرسول بولس لأهل أفَسُسْ من ٢٠٠٠ سنة، ولكن بعدو عَم يوَجِّها لكِلّ واحَد مِنّا الـيـوم.
هـالآيـِة ذكَّرِتني بخبريِّة طريفِة رَح حَملَك إيّاها زوّادة :
وَلَد عِمِل أوَّل قربانة ورِجِع عَ البيت، احتَفَلو الأهل بالفرحَة الجديدِة، بسّ طول وقت الإحتفال كان الولد فاتِح شفافو ومِش قادِر يطَبِّقُن.
ولَمّا سألوه ليش؟
قال :
«بخاف يختِنِق يسوع فِيّي».
شايفَك عَم تِبتِسِم بس فَكِّر إنّو هالطُفُل عَم يسألَك اليوم :
«يسوع يَللي فيك شو عمِلت فيه؟
بعدَك عم تلتِقي فيه؟
بَعدو عم يحكي فيك؟
بعدو عم يتجَلّى من خِلالَك؟»... أو مات واختَنَق؟؟؟
الزوّادة بتقلّي وبتقلَّك :
ما تطَفّي الرّوح يَللي فيك إنَّما ضَلّ تذَكَّر إنّو الروح اللي انعطالَك، مَنّو روح خَوف إنَّما روح قُوِّة وفِهِم، حِكمِة وعِلِم، مَحَبِّة وفُطنِة. والله معك.
المصدر : صوت المحبّة
