الله معك...


من زمان وعَ ضهر سفينة كان في رجّالَين راجعين ع بلَدُن، من بلد كتير بعيد وكان بَلَدُن جزيرة زغيرة وكتير بعيدة.

واحَد مِنهُن بيلاحِظ حَبِّة زغيرِة عَ الأرض، بيلِمّها وبيِتفَحَّصها. 

حَبِّة دُرَة، واحدة ما بتفيد، لَو كان كيس مِليان كان بيِنفَعني. 

وزَتّ الحبِّة.

التاني لمّ الحَبِّة وحَطّها بجَيبتو، ولمّا وُصِل عَ الجزيرة زَرَعها، كِبرِت وعُطيِت نَبتِة دُرَة، محصول زغير.

لكِن الرجّال رِجِع زَرَع المَحصول وقَطَف مَحصول جديد، عطى مِنّو أصحابو وزَرَع الباقي، ولَمّا زَرَعو الكِلّ كان المَحصول كتير كبير.

حَبِّة زغيرِة خَلِّت كِلّ أهل الجزيرة يَعرفو الدُرَة ويِزرَعوه. 

كِلّ شي بيبَلِّش زغير حتَّى الإنسان.

وبالعنايِة بيِكبَر.

وبالإيمان فيه بيِثمُر.

لكن إذا منِتطَلَّع بحالنا منلاقي إنّو ما عَنّا نَفَس طَويل وما عَم نَعطي حدا فُرصة تانيِة حتَّى يثبت ذاتو، وأوقات ما منعطي حالنا فُرصَة تانيِة.



الزوّادة بتقلّي وبتقلَّك :

نِعَم اللّه كتيرِة إخوتي إنَّما أوقات بتوصَل لَعَنّا مِن خِلال أحداث زغيرِة وناس زغار، يِمكِن ما بقا يمَلّولنا عيننا.

الزوّادة بتحَطّ بَين إيدَيك كَلِمات مار يعقوب إنّو الإيمان إذا ما ترافَق بالأعمال بيموت. والله معك.

المصدر : صوت المحبّة