الله معك...
بيخَبّرو عن المَلِك لويس الرابع عشر إنّو كان مَحبوب حُبّ كبير مِن قِبَل قادِة جَيشو لَدَرَجِة إنُّن ما كانو يُرُفضولو وَلا طَلَب، وكانو ينَفّذو الطَلَبات بِحَرفِيِّتها.
بيَوم مِن الإيّام قال المَلِك لأحد قادِة الجيش :
«أنا أكيد إنّي شو ما رَح أُطلُب رَح يِتنَفَّذ حتَّى لو قِلتِلَّك كِبّ حالَك بالمَيّ!».
قام القائد بسِرعَة مِن مَحَلّو ورَكَض، سَألو المَلِك :
«لَوَين رايِح؟».
جاوب :
«رايِح يا مَولاي إتعَلَّم السباحَة».
الزوّادة بتقلّي وبتقلَّك :
لَمّا بتُطلُب أيّ طَلَب مِن الناس حَطّ حالَك مَحَلُّن، إذا قادِر تنَفِّذ الطَلَب أُطلبو، إذا لأ، ما تِترَدَّد إنّو تِلغيه. والله معك.
المصدر : صوت المحبّة
