الله معك...
بيخَبّرو عن شبّ كان عندو مشكل مع الله، كان دايمًا يقِلّو :
«لَيش محَمِّلني صليب أكبَر من طاقتي؟ بترجّاك مُمكِن قُصّ مِنّو شقفِة، بَلكي بيصير أزغر؟».
قلّو الله :
«مِتِلما بدَّك فيك تعمِل».
وهيك صار، قَصّ شقفِة من الصَّليب، حِملو وكان كتير مَبسوط لحَتّى وُصِل عَ نهر، وعَ النهر ما كان في جسر.
حاوَل يِمرُق بس ما قِدِر، قَلّو للربّ :
«بترجّاك ساعِدني ما في جسر كيف بَدّي إمرُق؟».
قَلّو :
«حَطّ الصَّليب ومروق».
بسّ الصّليب طُلِع قَصير.
ساعِتها اكتَشَف إنّو الشَقفِة يَللي قَصّها من الصَّليب هيّي يَللي خَلِّتو يصير قَصير وما يكون جِسِر حتَّى يُعبُر عليه.
الزوّادة بتقلّي وبتقلَّك :
بحياتنا دايمًا في صُلبان، لازِم نِحمُل صَليبنا ونخَلّيه يصير جِسِر عُبور يوَصِّلنا للمَلَكوت والحياة التانيِة. والله معك.
المصدر : صوت المحبّة
