الله معك...
بأحد الإيّام كان في وَلَد عَم بيفَلفِش بِكُتُب بَيّو، وبَيّو إستاذ فَلسَفِة كبير، وبيوقَع نَظَرو عَ مقالِة بتِحكي عن الرّوح والجَسَد والقَلب والإحساس.
بيروح لعَند البَيّ وبيقِلّو :
«يا بَيّي اشرَحلي»
بيبَلِّش البَيّ بالحَكي عن القلب وأهمِّيتو وبيقِلّو للإبن :
«يا إبني لازِم يكون في عَنّا ٣ قلوب».
الإبن بيندِهِش وبيِصرَخ :
«كيف هالحكي؟».
بَس البَيّ بيكَمِّل وبيقول :
«قلب مِن لَحم ودَم حتَّى نحِبّ البَشَر، قلب مِن نار حتَّى نحِبّ الله، وقلب مِن تَنَك حتَّى نحِبّ المال».
سَكَت الإبن والسُكوت علامِة الرِضى.
الزوّادة بتقلّي وبتقلَّك :
ما تخاف تكون صاحِب تلات قلوب وإذا قَرَّرت تِستَبدِلُن بقَلب واحَد بِنصَحَك بالقَلب يَللي مِن نار لأنّو يَللي بيحِبّ الله ما فيه إلّا ما يحِبّ الإنسان ويحتِقِر المال. والله معك.
المصدر : صوت المحبّة
