الله معك...
عِمِل أحَد نُبَلاء بريطانيا حَفلِة عَشا، حُضُرها رئيس الوُزرا والعديد من الشخصيّات الرَسميِّة والمُعتَبَرَة.
خِلال المَأدِبِة، تقَدَّم أحد مُساعِدي رئيس الوُزرا وقَلّو :
«يا سَيِّدي، شِفِت إحدى السيِّدات عَم تِسرُق مَمْلَحَة فُضِّيِّة وتحَطّها بالجزدان يَللي حاملِتو بإيدها.. شو بتريد إنّو نَعمِل؟».
جاوب الرئيس :
«أنا بهتَمّ بالموضوع»..
توَجَّه رئيس الوُزرا إلى للطاولِة، وأَخَد مَملَحَة مِتِل يَللي أخَدِتها السَيِّدِة وحَطّها بجَيبتو.
وراح لعَند السَيِّدِة وطَلَب إنّو يِحكيها عَ إنفِراد، لَمّا صارو بعاد عن الناس، أخرَج المَملَحَة مِن جَيبتو، وقال للسَيِّدِة :
«يا سَيِّدَتي العَزيزِة، أنا خايِف مِن إنّو يَللي عمِلناه يِمكِن صار مَعروف مِن الكِلّ، ما في عَنّا حَلّ إلّا إنّو نرَجِّع هَالمَملَحتَين لَلمَحَلّ يَللي أخَدناهُن مِنّو».
الزوّادة بتقلّي وبتقلَّك :
لَو مَهما كان الغَلَط كبير منِقدَر بِطَريقِة عِلاجنا نخَفِّف مِن تِقلو، ومنَعطي الآخَرين فُرصَة للرُجوع عَن خطأهُن... والله معك.
المصدر : صوت المحبّة
