الله معك...
قدّام إنتقادنا لبَعضنا، ورغبِتنا بتَغيير العالم، منتأمَّل سَوا بهالخُبرة اللي حَكاها أحَد المُتَصَوِّفين.
بشبابي، كِنت ثَورَوي، وكانِت كِلّ صلاتي مَحصورَة بهالطلب :
«يا ربّ، اعطيني القُوِّة الكافيِة حتَّى غَيِّر العالَم».
ولَمّا صُرت عَ عَتَبِة سِنّ النُّضوج، اكتَشَفِت إنّو نُصّ حياتي مَرَق وما غَيَّرت شي، وتحَوَّلِت صلاتي :
«يا ربّ، اعطيني النِّعمِة إنّي غَيِّر عَ القَليلي اللي عَم بِلتِقي فيهُن كِلّ يَوم : عَيلتي، جيراني، أصحابي، وبكون مَمنونَك».
وهَلَّق، لَمَّن خَتيَرْت وصارِت إيّامي مَعدودِة، صلاتي الوحيدِة صارِت :
«يا ربّ اعطيني النِّعمِة إنّي غَيِّر ذاتي».
الزوّادة بتقلّي وبتقلَّك :
نحنا اليَوم منِحمُل زوّادِتنا صلا ومِنقول :
«يا ربّ، اعطيني التمييز الكافي تَ أعرِف شو لازِم يِتغَيَّر فِيّي، واعطيني يا ربّ القُوِّة حتَّى إقدَر أقدُم عَ هالخُطوِة، واعطيني نِعمتَك حتَّى إثبُت فيها. آمــــــــــــين». والله معك.
المصدر : صوت المحبّة
