الله معك...
بيخَبّروا إنّو كان في عصفور بيحِبّ كتير إنّو يطير.
ولكِن كان عَندو مِشكلة وحيدِة : كان لما يطير، يتعب بعد كم دقيقِة طيَران.
واستشار واحَد مِن أصحابو بالموضوع.
ونَصَحو إنّو يخَفِّف مِن وَزنو.
وبدل ما يخَفِّف العصفور مِن كِترِة الأكل اللي عم يضُرّو، قَرَّر إنّو يخَفِّف مِن ريشات جوانحو.
وصار يشيل ريشِة قدّام ريشِة، حتَّى لاقى إنّو وَزنو صار معقول.
وساعِتها حاوَل صاحِبنا يطير، ولكن كانو طارو كِلّ جوانحو.
الزوّادة بتقلّي وبتقلَّك :
ونحنا هَيك كمان.
بعلاقتنا مع ألله، حابّين كتير إنّو نطير ونوصَل لعِندو.
ولكِن عَ قَدّ ما همومنا كتار، وإنشِغالنا فيها بياخُد كِلّ وقتنا، منصير نِلغي صلا مِن هَون، وزيارة قربان مِن هَون، وقدّاس مِن هَون وصَوم مِن هَون، ومِنقول :
«بسيطَة، كِلّها مرَّة».
وبيوصَل وَقت بتكون طارِت فيه الجوانح اللي بَدّها توَصِّلنا لله.
والزوّادة بتدعيك اليوم إنّو تِنتِبِه.
كِلّ ما حَسَّيت بِرَغبِة تمِدّ إيدَك وتشيل ريشِة مِن جوانحَك، تذَكَّر هالخبريِّة، واعدل عن قرارَك. والله معك.
المصدر : صوت المحبّة
