الله معك...
بيخَبّرو عن مَلِك أعوَر وأعرَج و أكتَع، بيَوم من الإيّام طَلَب من الرسّامين يتفَنَّنو بِرَسمو ويِخفو عيوبو، والرسّام يَللي بيحَقِّقلو طَلَبو بيِربَح جايزِة قَيِّمِة جِدًّا.
ما فاز بهالمُهِمِّة الشاقَّة إلّا رسّام واحد.
والسبب إنّو تخيَّل الملك عم بيقَوِّص من بندقيتو هوّي وراكع عَ ركبتو (ما عاد مبَيًّن أعرج) وهوّي مغَمَّض عين من عيونو (ما عاد ظاهر أعور) وهوّي لاوي إيدو (ما عاد مبَيِّن أكتع).
الزوّادة بتذكّرني وبتذكرك
بالمَتَل الشَعبي يَللي بيقول :
مِش كِلّ شي بيِلمَع دِهَب.
ما لازِم نوقَف قدّام المنظر الخارجي لازِم نتخَطّى ونوصَل للداخِل. والله معك.
المصدر : صوت المحبّة
