الله معك...
بيَوم الجمعة العظيمِة يوم موت الربّ يسوع إسمحلي خَبرَك الخبريِّة :
في شخص كان هارِب مِن الموت وكان عم بيفَتِّش عَ مدينِة ما فيها موت.
تَرَك مدينتو وسافَر لَبَلَد بعيد عَ أمَل إنّو هونيك ما يكون في موت.
وُصِل سأل قالولو لا ما في موت.
بعد فترة بيشوف شخص حاملينو عَ كرسي لابس تياب كتير حلوة والنّاس ماشيين معو بموكب، سأل :
«مين هيدا؟»
قالولو :
«هيدا الرجّال إشترى بيت ورايح يسكُن فيه بس المشكل إنّو هالبيت بيِدخُل عليه وما عاد بيطلَع مِنّو».
فِهِم إنّو هيدا الموت بس بوجه جديد.
تَرَك المدينِة وراح عَ مدينِة تانيِة وِجّ جديد وتياب جداد للموت إنّما الموت موت، سافَر لَبَلَد آخر، هونيك سأل :
«في عندكن موت؟».
قالولو :
«لأ، بس في عنّا رجّال بيطُلّ من خلف الجبل بيعَيِّط لكِلّ واحَد بإسمو بيروح وما بيِرجع لعندو».
قال :
«ضَروري تروحو؟ شو بَدكُن مِنّو!؟ إنتو بشِغلكُن وهوّي بشِغلو».
عاش هَونيك بفَرَح وسعادة وبعد فترة بيطُلّ الرجّال وبيعَيِّطلو، قَلّو :
«مِش فاضيلَك في عندي شِغِل فَلّ».
إنَّما بعد فترة رِجِع وعَيَّطلو، كمان الجواب كان مش فاضي، لَبيَوم من الإيّام بيقول لمَرتو :
«حَضريلي زوّادتي أنا رايِح فُضّ المَشكَل مَعو وبرجع لعَندِك».
راح وبَعدو بيِرجع.
ومِن يومها الناس بيقولو :
مين راح لهَونيك ورِجِع خبَّرنا شو في.
الزوّادة بتقلّي وبتقلَّك :
في حدا راح ورِجِع وخَبَّرنا شو في؟ أكيد عرِفِت مين هوّي؟
يسوع، يسوع المسيح.
مات وإنتَصَر عَ المَوت وقام باليَوم التالِت وخَبَّرنا إنّو عند الآب في منازِل كتيرة لإلنا. والله مَعَك.
المصدر : صوت المحبّة
